‎دورِ حاضر میں سرکاری اسکولوں کا تعلیمی نظام: ایک سنجیدہ جائزہ

آج ہم ایک ترقی پذیر دور میں جی رہے ہیں جہاں ٹیکنالوجی نے زندگی کے ہر شعبے میں انقلاب برپا کر دیا ہے۔ ہر کام سیکنڈز میں ممکن ہو چکا ہے، اور تعلیم کا شعبہ بھی اس انقلاب سے مستثنیٰ نہیں۔ آج ایک موبائل فون میں پوری دنیا کی معلومات سمیٹی جا سکتی ہیں، لیکن بدقسمتی سے ہمارے سرکاری مدارس میں اس جدید ٹیکنالوجی سے فائدہ اٹھانا اب بھی ایک بڑا چیلنج ہے۔

کئی ایسے اساتذہ جو 50 سال کی عمر پار کر چکے ہیں، آج بھی روایتی طریقہ تعلیم پر قائم ہیں۔ وہ جدید تدریسی آلات یا ای-لرننگ کے تصور سے ناواقف یا اس کے استعمال سے خائف نظر آتے ہیں۔ ہر روز بدلتے تدریسی طریقہ کار اور طلبہ کی بدلتی ضروریات کے ساتھ ہم آہنگ ہونا ان کے لیے ایک ذہنی دباؤ کا باعث بن رہا ہے۔ یہ دباؤ اکثر انہیں بیمار بھی کر دیتا ہے۔

ایسی صورت میں، جب ایک استاد جسمانی و ذہنی طور پر کمزور ہو، تو کیا وہ کلاس روم میں طلبہ کو معیاری تعلیم دے سکتا ہے؟ یقیناً نہیں۔ ایسے میں سوال یہ اٹھتا ہے کہ حکومت اس مسئلے پر کب سنجیدگی سے غور کرے گی؟ کیا ہمارے بچوں کا مستقبل اسی خستہ نظام تعلیم کے رحم و کرم پر رہے گا؟

دوسری طرف ہمارے ملک کے کئی نوجوان ٹی ای ٹی اور سی ای ٹی جیسے امتحانات پاس کر کے جدید تدریسی مہارتوں سے لیس ہیں، لیکن یا تو بے روزگار ہیں یا نجی اداروں میں معمولی تنخواہوں پر کام کر رہے ہیں۔ کیا یہ حکومت کی ذمہ داری نہیں کہ وہ ایسے باصلاحیت نوجوانوں کو سرکاری مدارس میں موقع فراہم کرے تاکہ وہ تعلیم کے معیار کو بلند کر سکیں؟.یہ وقت ہے کہ حکومت سنجیدہ اقدامات کرے:

55 سال کی عمر کے بعد اساتذہ کو سبکدوشی کی پالیسی پر غور کیا جائے۔

نوجوان، ٹیکنالوجی سے واقف اساتذہ کی بھرتی کی جائے۔

اسکولوں میں بنیادی سہولیات اور جدید تدریسی وسائل مہیا کیے جائیں۔

پرانے اساتذہ کے لیے ری ٹریننگ اور ذہنی سکون کی اسکیمیں لائی جائیں۔

کسی نے خوب کہا ہے:

> قوم کا باغباں استاد ہے، گر استاد برباد تو گلشن برباد

یہ وہ سچائی ہے جسے ہم نظر انداز نہیں کر سکتے۔ اگر ہم چاہتے ہیں کہ ہماری نسلیں کامیاب ہوں، تو ہمیں اپنے تعلیمی نظام کو اپڈیٹ کرنا ہوگا۔ اس تبدیلی میں سب کی شمولیت ضروری ہے — حکومت، والدین، اساتذہ اور طلبہ سب کو اپنا کردار ادا کرنا ہوگا۔

آئیے مل کر کوالٹی ایجوکیشن کی طرف قدم بڑھائیں۔

جے ہند

تحریر: روبینہ تبسم ہتّرکی